هاستنــى الامــل بكــرة

هاستنى الامل بكرة

على وعدى ..... على ميعادى

يا أحلامى

ومهما العمر هيعدّى ..... ومهما هتجرى أيامى

ومهما السكه هتودّى ..... لدرب الحيرة والمجهول

سواد الليل ماهوش هيطول

هأبات واحلم بيوم تانى ..... هأقوم واتحدّى أحزانى

وفوق رمشى ..... دموع العين .. مبتنمشى

ولا بتموت ..... يفوت العمر مهما يفوت

هيفضل بكرة مش معروف ..... وأموت م الخوف

وانا شايف سواد الليل ..... بيتهجّم على عنيّه

وبيلملم ف توب الضى ..... والاقى الدنيا حوالىّ

نقط وحروف ..... ومعنى الكلمه مش معروف

وابص اشوف ..... خطوط العمر على كفّى

بلا بدايه ولا نهايه ..... وخط الحلم كان مكسوف

وأضم ايديّه وانا خايف ..... يكون نفس المصير مكتوب

واشوف الشمس ف لحظات الغروب ..... وبدوب

وانا شايف شعاع الحلم ..... بتنقبض روحه

وموته بطئ ..... ومين هيطيق

يشوف حلمه اللى ياما بناه على جروحه ..... بيتوجّع

ومقدرتش ..... اشوف حلمى اللى متربّى على العزّه

حزين مكسور ..... ياريت يبقى الغروب لحظه

ويمضى الليل ..... وهستنى الامل بكرة